de Lisandru Beccu
L'aìamus naradu a pustis de sa partida contra su Cesena, in Novara su Casteddu “non devet fàghere sas matessi faddinas de Pescara”.
Puntuale però est arribada sa cunfirma chi sos ruju-biaitos de Rastelli
si movent a duas velotzidades. Furitos in domo e puddas in trasferta,
duas caras de sa matessi medàllia. Tocat de cumprèndere pro ite
s'iscuadra a tesu dae su Sant'Elia istentat a prodùere giogu, paret
istraca, firma, sena ideas.
Custa est sa de sete partidas a fila pare
chi leat gol. Fintzas Farias, su mègius de sa chida colada, oe pariat
un'àtera persone rispetu a cussu chi amus bidu contra su Cesena.
Rastelli devet chircare de cumprèndere cale est su mecanismu chi in
trasferta non funtzionat e tocat de l'acontzare, ca si bi l'at pitzigada
su Novara, bi la podent pitzigare totus a bìnchere contra a sos
favoridos de su campionadu. Duncas tocat de s'acartzonare.
B'at de
nàrrere chi sos meres de domo si l'ant giogada bene sa partida,
pressende in totu sas zonas de su campu. Giai a sos primos minutos sos
piemontesos, prus dinàmicos, gestint mègius sa botza rispetu a sos
sardos chi resurtant pagu pretzisos cun sos passàgios. Pro bìdere carchi
cosa de bonu tocat de isetare a su de 36 minutos, cando Gonzales nche
fuet a Ceppitelli e cun unu tiru de esternu nche marcat su vantàgiu
novaresu. Storari podet petzi abbaidare. Pro su Casteddu no est die, non
resesset a èssere perigulosu comente si tocat nemmancu una borta, sos
giogadores parent lentos, previdìbiles. Petzi in sos ùrtimos minutos
arribat s'ocasione pro su parègiu, ma s'incorrada de Cerri, intradu a su
postu de Giannetti, nch'essit a foras. Acabbat gosi sa partida, 1-0,
sos òmines de Marco Baroni si nche leant tres puntos e si nch'essint dae
sa zona retrotzessione. Su Casteddu torrat cun sos pees in terra e nche
perdet su primu postu a favore de su Crotone, binchidore contra su
Livorno. Custa est sa Sèrie B, a la bìnchere bi cheret atza, pro non
nàrrere àteru!
Formatziones
Novara:
Tozzo, Dell'Orco, Vicari, Troest, Faraoni (27' Dickmann), Casarini,
Viola, Farago, Gonzales (72' Garòfalo), Evàcuo (79' Galabinov), Corazza.
Allenadore: Màssimo Rastelli
Casteddu:
Storari, Barreca (57' Di Gennaro), Ceppitelli, Salamon, Pisacane (75'
Murru), Dessena, Fossati, Joao Pedro, Farias, Melchiorri, Giannetti (57'
Cerri).
Allenadore: Marco Baroni
Gol: 36' Gonzales
