 |
| Deretos Ansa. Naor Gilon, s'ambasciadore israelianu in Roma. URL imàgine |
Àteros duos sordados israelianos assachiados oe - a banda de
mangianu - dae unos cantos palestinesos, a corfos de lepa. In duas
ocasiones diferentes a curtzu a Hebron. In ambos casos sos assachiadores
- no est craru cantos esserent - ant àpidu sa peus sorte: mortos suta
su fogu istitutzionale de sos sordados israelianos. Fogu de reatzione,
narant sos mèdios. Unu intre sos atacos est acontèssidu pròpiu in s'oru
de sa tumba de sos Patriarcas. In tantu sas famìlias de sos mortos
palestinesos de Gerusalemme - oramai ùndighi dae cando sunt cumintzados
sos atacos - ant pedidu chi lis torrent sas carenas pro lis pòdere
dare un'interru dèghidu.
Totu custu fiat acontessende cando - in Roma in unu Forum de s'Ansa - fiat chistionende Naor Gilon. S'ambasciadore israelianu at arringadu sas reatziones ispropositadas de sos sordados sustenende chi àteru remèdiu non bi nd'at. «Chie s'atrivit a assachiare - siat a resòrgia, siat a àtera manera - unu militare o unu tzivile israelianu non podet pensare chi nche potzat essire biu». Custas sas paràulas de s'ambasciadore. «Non b'at alternativa - at agiuntu - sos assachiadores tocat a los mòrrere, tocat a nche catzare su problema dae sa raighina fintzas pro dare esempru a sos àteros». Perunu mentovu in contu de resones. De cunditziones de vida chi sos palestinesos sunt colende·nche in Gerusalemme. Perunu tzinnu a sa conduta ratzista de su guvernu natzionale e tzitadinu. Perunu faeddu pro s'istadu de umiliatzione - cando non pròpiu de segregatzione - chi sunt bivende giòvanos e betzos. In iscola, in logu de ospidale, in sos mezos pùblicos. In totue.
Duncas, sos mìlites l'ant leadu in sensu literale su cussìgiu-dictat de Nir Barkat. Su sìndigu de Gerusalemme - unas cantas dies a oe - aiat decraradu in sa televisione de istadu: «Sos chi podides, chi seis annestrados, chi tenides un'arma e connoschides sas règulas pro s'impreu issoro, girade armados! Sos israelianos cumprendent prus chi non bene chi sos gurgos tzitadinos sunt comente a sa prima lìnia. Girende cun sa pistola in chitu, unu s'intendet prus seguru e creschet finas su sentidu de seguràntzia generale peri sos caminos». E sos sordados - giai s'ischit - ubbidint a sos òrdines. Finas a sos prus iscurigosos e fascistas. Cando imbetzes - e s'ischit finas custu - una democratzia diat dèvere connòschere e duncas ischirriare sa difesa legìtima dae s'etzessu de difesa e dae s'ofesa. Ma no in Gerusalemme. No in Israele. Paret pròpiu chi - in cue - sa democratzia e sa giustìtzia tèngiant un'àteru sentidu.
