 |
| deretos Ansa |
Custa est sa de tres bias chi sa nae norvegesa Siem Pilot nche crompet a Casteddu cun unu grustu de migrantes sarbados in su canale de Sitzìlia. In custu biàgiu ddoe nde fiant 781 e, peri, ses corpos sena vida (bator fèminas e duos òmines). Su 18 de trìulas sa Siem Pilot nche nd'aiat batidu 451, su 24 de austu 963.
Pessones,
èsseres umanos, gente in cherta de un'ispera, segura de si cunfrontare
cara a cara cun sa morte perdende bortas medas su disafiu. Gente chi
sufrit e bisat, gente manna o minore che a su pitzinneddu sirianu
abratzadu dae is abbas turcas. Pessones chi, arribende in Europa podent
agatare voluntàrios, podent retzire sa solidariedade e su “bene
bènnidos” in is istàdios de fùbalu tedescos, ma peri muros artziados,
lagrimògenos, marcaduras in is bratzos e òdiu chi nche colat dae is
retes sotziales e dae is servìtzios giornalìsticos chi non leant in
cunsideru, cun sa matessi mesura impreada in Mineo, sa crònaca niedda cando a bi mòrrere est un'ucràinu.
Sun dies in ue su meledu devet
bìnchere cara a is “carignos” xenòfobos de chie s'est fraighende su
tempus benidore polìticu dende impèllida a una gherra intre pòveros
càrriga de cunsighèntzias pìdigas pro totu cantos.
