Reforma Ap, Renzi paret in su Nürburgring

de Maurìtziu Sale

At dominadu sa presse eris in su Senadu, in sos traballos de reforma de s'amministratzione pùblica. Ant aprovadu, sena peruna modìfica o emendamentu, 11 artìculos subra de 23. In mesu a sos àteros bi fiat s'artìculu in ue si previdit de collire a pare su corpus forestale de s'Istadu cun s'arma de sos carabineris. In intro de oe previdint de nche serrare totu sos traballos, bidu chi su bonu de sos ostàculos nche parent barigados. Dae su riòrdinu de sa dirigèntzia pùblica a s'ampriamentu de sa fòrmula de su "silèntziu assensu".

Como abarrat de votare petzi unu intre sos capìtulos prus dibàtidos de su ddl: sa ratzionalizatzione de sas sotziedades a partetzipatzione pùblica. Su Guvernu est giai pensende a sa fase de atuatzione, a sa Gazeta ufitziale e a totu sos àteros decretos chi ant a essire a pustis desa reforma forsis prus dìliga. Sunt giai ammaniende una sèrie de decretos legislativos de sutapònnere a su primu Consìgiu de sos ministros chi b'at a èssere a pustis de sa pàusa istadiale, comente at acraridu su reladore a su ddl Giorgio Pagliari.
"Su presidente de su Consìgiu est apretende·nos. Como bidimus cantos sunt sos interventos e sa durada issoro e no est naradu chi non cumintzemus a votare giai dae custu sero. Ma penso chi si nd'at a faeddare cras".

Sa presse nât chi no est bona cussigera nos narat su ditzu. Mescamente in chistiones dìligas che a sas polìticas e istitutzionales. Ma Renzi est avesu a custos ritmos e, a cantu at dadu a cumprèndere dae su Giapone, in ue nch'est in bìsita ufitziale a su primu ministru Shinzo Abe, nât chi tocat a incarcare galu de prus subra de sa tauledda de s'atzelleradore. At a èssere pro cantu b'at benzina.