“Meeting” de Rìmini, Mattarella: «Dae su terrorismu is sèmenes de una gherra mundiale noa»

de Màuru Piredda

Wikimedia

Non ddoe at annu chi su “Meeting” de Rìmini, ammaniadu dae Comunione e liberazione, non pòngiat in sa mesa unos cantos temas chi, posca, nch'intrant in s'agenda de sa dibata polìtica italiana.
S'esòrdiu, cuntènnidu in intro de su messàgiu de saludos imbiadu dae su presidente de sa Repùblica Mattarella, est de prima pàgina: «Su terrorismu, peri alimentadu dae distorsiones fanàticas de sa fide in Deus, est in chirca de introduire in su Mediterràneu, in s'Oriente mesanu e in Àfrica, is sèmenes de una gherra mundiale noa». Cales diant èssere is mesuras pro l'evitare? «Istransire·nche s'òdiu, fàghere crèschere sa cunfiàntzia e sa cooperatzione, mustrare is bantàgios de sa paghe». Mesuras agigu in pòrfia cun is règulas de su profetu chi ghiant is relatziones econòmicas e internatzionales. Règulas chi ant cajonadu is primas duas gherras mundiales e chi, in intro de s'istadu italianu, nche brincant peri «is balores – semper impreende is faeddos de Mattarella – chi s'agatant a sa base de sa Costitutzione e chi tenent su bisòngiu de èssere acumpridos».