de Màuru Piredda
A pustis de una prima protesta ordingiada martis coladu, is famìlias in
cumbata pro sa domo, paris cun unos cantos manifestantes solidales, si
sunt torradas a oviare eris a merie cara a su Consìgiu comunale de
Casteddu. Sa chistione est semper sa matessi: cuntrastare s'emergèntzia
abitativa movende dae is distacos de s'abba chi ant interessadu is
abitantes de is carreras de Cagna, Zucca e Flumentepido.
In su volantinu
difùndidu in is dies in antis si podet lèghere chi is pessones e is
nùcleos familiares «pro no abarrare sena una cobertura sunt obligados a ocupare e a bìvere una cunditzione de abusivismu». E chi «s'ùnica risposta a custa situatzione de emergèntzia est istada sa de is distacos».
Pro is manifestantaes (ca nât chi «ddoe at domos medas sena gente e gente meda sena domos»)
est pretzisu a pònnere a disponimentu is allògios bòidos de sa tzitade e
a atacare a nou s'abba pro totus is ocupantes finas a cando no ant a
èssere tramudados. A pustis de s'istesiamentu postu in òpera dae sa
politzia e de sa firmada de su tràficu in carrera de Roma su sìndigu
Zedda at detzìdidu de imbènnere is manifestantes. Oe at a èssere fissada
sa data pro un'addòbiu ufitziale intre is partes.
