de Màuru Piredda
Sighint is operatziones de sucursu de sa Guàrdia costera italiana in su
tretu marinu de su canale de Sitzìlia (a belle 15 mìllias a nord dae sa
Lìbia) a pustis de su naufràgiu acontèssidu eris a banda de merie. In
s'imbarcatzione interessada ddoe aiat unos 700 migrantes. 400 nât chi
sunt sarbos. Sunt imbetzes 25 is mortos recuperados ma si timet chi su
nùmeru potzat crèschere (ddoe at chie faeddat de chentinas).
Si narat
chi is imbarcados si nche siant iscostiados totus conca a unu chirru
comente ant bidu una nae irlandesa arribende a ddos sarbare. Siat
comente si siat su mare nostru sighit a si nch'ingurtire vidas intreas
in cherta de unu benidore dignu. Is retes sotziales, imbetzes, sighint a
dare boghe a gente chi acollit festosa custas acontèssidas.
