de Lisandru Beccu
Intro de note sunt crèschidos sos bombardamentos contra a sas bases de
su Pkk (Partidu de sos Traballadores de su Kurdistan) in su nord de
s'Iraq, a òpera de s'aeronàutica turca. S'ofensiva est andende dae in
antis belle una chida, a pustis de su degòlliu de Suruc, cando unu
pitzocu de s'Is (a su chi narant sas fontes turcas) s'est fatu esplòdere
ochiende prus de 30 pessones (mescamente curdos).
Subra de sa
chistione, su pàrrere de su Pkk imbetzes fiat diferente e cumparit in
s'acusa a su guvernu turcu de àere disinnadu s'atentadu in pare cun
s'Is, e duncas, a pustis de tres dies, su Partidu de sos Traballadores
de su Kurdistan at revengadu sa morte de duos politziotos turcos.
Dae
cussu momentu Èrdogan at seberadu s'interventu armadu contra a s'istadu
islàmicu, ma in s'ìnteri fintzas contra a sos curdos. Atacos chi sunt
indiritzados mescamente contra a custos ùrtimos, impinnados gasi etotu
in sa batalla contra a su Califadu.
In cada manera, custas fainas ant
fatu pensare chi in sa prioridade de Ànkara b'esseret s'indebilitamentu
de sas fortzas de opositzione polìticas de su Pkk. Faina chi su guvernu
at negadu.
