de Màuru Piredda
Is sindacados Feneal-Uil, Filca-Cisl e Fillea-Cgil sunt oriolados pro su
tempus benidore de is 3mìgia dipendentes italianos. A s'àtera ala sa
famìllia Pesenti narat chi «contat s'isvilupu». Ma a banda de
custos meledos sa noa est chi Italcementi at tzèdidu su 45% de is
atziones a su grupu tedescu Heidelberg (operatzione de 1,6 milliardos de
èuros).
Imoe su grupu est su primu a livellu mundiale in su setore de
is agregados, su segundu pro su chi pertocat su tzimentu e su de tres in
contu de carche-istrutzu. Custa tzessione benit a segus de sa fusione
intre àteros duos gigantes de su cumpartu, su grupu isvìtzeru Holcim e
su frantzesu Lafarge.
Una mustra de sa tendèntzia de su capitalismu in
custu cuntestu de crisi chi nch'est a tesu meda dae su «piticu est
galanu» teorizadu dae unos cantos economistas. In su 2014
HeidelbergCement at marcadu 12,6 milliardos de ricavos cun belle 45mìgia
dipendentes in prus de 40 paisos. Su valore suo est de belle 14
milliardos in sa Bursa de Francuforte.
Is cuotatziones de Italcementi,
imbetzes, nche colant, cun custa operatzione, dae 2,3 a 3 milliardos.
Italcementi est presente in Sardigna cun s'istabilimentu de Samatzai e
cun su tzentru de distributzione de Codronzanu.
