de Maurìtziu Sale
Pagu prus o mancu chimbanta sunt sos ètaros de padente chi si sunt
pesados in fumu in sa localidade Corallina, trintaghimbe in Santu
Tiadoru. A chentinas fiant sos turistas chi nch'ant evacuadu dae sas
marinas, chi nch'ant istesiadu dae su villàgiu "La Corallina" e dae
s'albergo "Ollastu". Est su bilantzu tristu de sa die de eris, in su
nord-est de Sardigna.
Die de fogu, de fumu e, che a semper in istade, a
manu tenta cun su maestrale, de terrore. Paret chi siat mòvidu dae
s'oru de su caminu, in logu a ue chie si siat nche podet cròmpere cun
fatzilidade e pro custu sos investigadores non nch'escludent chi potzat
èssere de orìgine dolosa. In Terranoa su fogu paret chi siat mòvidu a
curtzu de su villàgiu "Le Vele", su matessi logu dae ue fiat mòvidu
bator annos a oe e cun su matessi ìmpetu de bisestru.
