Aprontende sa partida de oe Rastelli aiat promìtidu batalla pro nch'intrare a su ladus de manca de sa classìfica, ma s'iscuadra, oramai satzada dae sa sarvesa matemàtica, no at produidu nudda e est torrada a domo cun una derrota grae. In s'ìnteri sa Juventus binchet su de 6 campionados a fila a pare.
Sos emilianos, a pustis de 13 minutos fiant giai in vantàgiu de tres gol. A su de 7 minutos Mignanelli iscràvigat de destru dae foras de s'àrea e agatat su gol de su vantàgiu. Su raddòpiu arribbat a su de 12 minutos cun Berardi. S'atacante aprofitat de una faddina de Rafael in su rinviu e signat su 2-0. Nche colat petzi unu minutu e su puntègiu est giai 3-0. Politano, torra dae foras de s'àrea, lassat mòvere unu mànchinu bene sestadu chi non lassat peruna possibilidade a su portieri ruju-biaitu. Su Casteddu paret chi nche siat abarradu in sos ispogiadòrgios. Sos sardos incurtziant s'isvantàgiu a su de 25 minutos. Su passàgiu traessu de Isla est perfetu pro Sau chi antìtzipat totu sos defensores e nche marcat su 3-1. A su de 34 minutos unu tiru lìberu de Sensi donat a sos nieddu-birdes su de bator gol. Su tiru est deviadu dae Borriello chi, in pràtica, lassat in bambis a Rafael.
In su segundu tempus sos òmines de Rastelli paret chi apant sas ideas prus craras. A su de 52 minutos Pisacane leat sa traessa. Su de chimbe gol emilianos arribat a pustis de tres minutos: s'àrbitru cuntzedet unu tiru de penalidade pro unu fallu de manu de Borriello. Iemmello trasformat in gol. Su Casteddu non si rendet e a su de 60 minutos nche marcat su raddòpiu cun Ionita, intradu a su segundu tempus in càmbiu de Padoin. Su tzentrocampista brincat prus in artu de totus e nche la ponet in intro cun sa conca. Su tempus nche colat cun carchi ammonitzione e cun carchi sostitutzione. In sos ùrtimos minutos b'at galu tempus pro su gol de Matri chi intertzetat su passàgiu de Lirola e depòsitat sa botza in porta. Acabbat 6-2 pro su Sassuolo. Su Casteddu at a tènnere sa possibilidade de si riscatare domìniga chi benit, in su Sant'Elia, in s'ùrtima partida de campionadu contra a su Milan.
Formatziones
Sassuolo: Consigli, Lirola, Antei, Acerbi, Peluso, Aquilani (75' Biondini), Magnanelli, Sensi, Berardi, Iemmello (66' Matri), Politano (84' Ragusa).
Allenadore: Eusebio Di Francesco
Casteddu: Rafael, Isla, Pisacane, Bruno Alves, Murru, Tachtsidis, Padoin (46' Ionita), Joao Pedro (74' Han), Sau, Farias, Borriello (61' Faragò).
Allenadore: Massimo Rastelli
Gol: 7' Magnanelli, 12' Berardi, 13' Politano, 25' Sau, 34' Sensi, 56' Iemmello (p), 60' Ionita, 90' Matri
