de Màuru Piredda
«Nos
narant: cumpeti, est sa lògica de su mercadu. Rispondimus: cooperamus,
funtzionamus de àtera manera». Gasi comintzat su manifestu, iscritu in
castillianu e in galitzianu, chi agatamus in s'indiritzu saltamos.net.
Ma custu brincu, ite est? Sa de su mensile “El Salto” est una proposta
editoriale noa chi, in s'istadu ispagnolu, est essida a campu gràtzias a
s'idea de “Diagonal”, bindighinale chi eris at pùblicadu s'ùrtimu nùmeru suo (su de 284, a pustis de 12 annos de informatzione «crìtica e
indipendente, sena diretore nen cabos»). In pare cun Diagonal b'at una
bintina de àteros «progetos comunicativos de totu s'istadu» pro donare a
sos letores «unu mèdiu nou in su 2017».
“Chie los pagat?”, diat pòdere
pregontare chie si siat. Dae su 28 de santandria est comintzada sa
campagna de atzionariadu populare chi at a durare ses meses. «Non
cherimus dipèndere dae sos guvernos e nemmancu dae sas
impresas, ma dae una comunidade de mìgias de sòtzios e sòtzias, cun
possibilidade de detzìdere, si lu disìgiant, subra de sas chistiones
tzentrales de su mèdiu».
Passos imbenientes? In su mese de freàrgiu at a
essire su nùmeru zeru, su nùmeru pilota a tales chi sos sòtzios lu
potzant avalorare; in abrile su primu nùmeru e su mese a pustis su situ
web (como esistet petzi su blog trampolinu). Nuscos de libertade
informativa si pesant dae sas terras ibèricas.
A sas fèminas e a sos
òmines de “El Salto” sas mègius uras sunt prus chi non dèghidas.
