Una partida bastante difìtzile sa de oe in su Santu Elia. Su Napoli non perdet dae su 28 de santugaine (2-1 in Torinu contra a sa Juventus). Sos partenopeos non cherent pèrdere su cuntatu dae sa Roma e dae su Milan, ambos in segunda positzione in classìfica. Su Casteddu, imbetzes, arribat dae su parègiu de Pescara. Duos puntos pèrdidos a su de 92 minutos.
Su disafiu cumintzat cun sos asulos protagonistas. S'iscuadra de Mauritzio Sarri si nch'apròpiat de su giogu e non lassat tretu a su Casteddu. A su de 34 minutos Mertens retzit sa botza palas a sa porta, si fùrriat a lestru e inferchit a Storari cun unu destru sicu chi nch'intrat bassu in su segundu palu. Su Nàpoli a su de 42 minutos perdet a Koulibaly pro infortùniu, in càmbiu intrat Albiol. Nche colant petzi duos minutos e sos istràngios raddòpiant cun Hamsik. Callejon faghet mòvere unu passàgiu traessu pro sa conca de Insigne, chi però l'indiritzat a sa traessa. Sa botza torrat in segus a sos pees de su tzentrocampista islovacu chi nche marcat su 2-0.
Su segundu tempus sighit sa matessi trata de su primu. Su Casteddu non cumbinchet e no agatat tretos lìberos pro isvilupare su giogu. A su de 51 minutos sos campanos signant su de tres. Zielinski iscùtzulat dae foras de s'àrea e nche còllocat sa botza in su cugioneddu a sa dereta de Storari. A su de 60 minutos Storari ipnotizat a Mertens chi aiat aprofitadu de una faddina defensiva. Noe minutos a pustis, però, su giogadore belga nche marcat su de bator. Insigne ismarcat a Mertens in intro de s'àrea e l'arrumbat sa botza de su 4-0. Sa de chimbe arribat tres minutos a pustis. Su protagonista est semper s'atacante Fiamingu chi nche brincat sa defensa e cun su mànchinu signat sa tripleta personale.
Pro su Casteddu est una die de nch'ismentigare in presse.
Formatziones
Casteddu: Storari, Isla, Ceppitelli, Bruno Alves, Pisacane, Padoin, Tachtsidis (54' Farias), Dessena (79' Capuano), Barella, Borriello (70' Melchiorri), Sau.
Allenadore: Massimo Rastelli
Napoli: Reina, Hysaj, Chiriches, Koulibaly (42' Albiol), Strinic, Zielinski (70' Rog), Jorginho, Hamsik, Callejon, Mertens (75' Giaccherini), Insigne.
Allenadore: Maurizio Sarri
Gol: 34' Mertens, 45' Hamsik, 51' Zielinski, 69' Mertens, 72' Mertens
