Su Casteddu, a pustis de su 4-1 de Roma, torrat a incarcare su terrinu de su Santu Elia, in Casteddu. Custa borta su cunfrontu est a lu medire cun su Palermo, iscuadra chi est in sa zona caente de sa classìfica e chi tenet bisòngiu mannu de conchistare puntos. Sos sardos imbetzes, a pustis de sas derrotas cun Fiorentina e Lazio, cherent dare unu signale nou, mescamente pro su chi pertocat sos gol subidos. A su Casteddu, in 10 partidas, nde l'ant fatu 23: sa peus defensa de su campionadu.
Sa partida non resurtat a decollare e su giogu paret agigu ligadu. Forsis sa resone est chi ambas sas iscuadras non si diant chèrrere iscobèrrere tropu pro no arriscare de subire gol. Càpitant una paja de ocasiones siat pro sos ruju-biaitos e siat pro sos rosa-nieddos, ma non resessent a cumprire nudda de cuncretu. Su primu tempus non nos donat perunu momentu de importu, comente chi b'aeret unu blocu mentale in sa conca de sos giogadores cundida dae un'agigu de timòria.
In su segundu tempus su ritmu mudat e su Casteddu andat in vantàgiu a pustis de sete minutos. Su marcadore est Daniele Dessena chi nche collit unu passàgiu traessu de Di Gennaro e, a bolu, inferchit a Posavec cun un'esternu destru. Deghe minutos a pustis su capitanu casteddaju si cuntzedet su bis e nche giughet sos suos a su 2-0. Dae su ladus de manca Sau nche ponet in mesu sa botza; su passàgiu, agigu arretradu, est pretzisu pro su tzentrocampista sardu chi, semper cun su destru, nche l'iscàrrigat a intro de porta. Su Palermo reagit a su de 79 minutos cun Nestorovski. Tantu pro cambiare sa defensa ruju-biaita si nche dormit e su giogadore matzèdone aprofitat de unu passàgiu traessu de Rispoli pro incurtziare s'isvantàgiu. Sa partida acabbat cun su Casteddu chi chircat de poderare su possessu de s'isfera e cun su Palermo chi proat a nche paregiare su resurtadu, ma su tempus est pagu e s'àrbitru Irrati frùschiat s'acabu.
Formatziones
Casteddu: Storari, Isla, Ceppitelli, Bruno Alves, Pisacane, Padoin (72' Munari), Tachtsidis, Dessena, Di Gennaro (83' Barella), Sau (76' Melchiorri), Borriello.
Allenadore: Massimo Rastelli
Palermo: Posavec, Rispoli (83' Morganella), Cionek, Andjelkovic, Aleesami, Hiljemark, Jajalo, Chochev (71' Henrique), Embalo (63' Diamanti), Nestorovski, Quaison.
Allenadore: Roberto De Zerbi
Gol: 53' Dessena, 64' Dessena, 79' Nestorovski
