Sos sardos torrant cun sos pees in terra incassende 5 gol dae sa Fiorentina. Su vantàgiu de Di Gennaro at petzi illusu sos tifosos ruju-biaitos. Sos viola toscanos luego ant prenadu su sacu cun bator marcaduras petzi in su primu tempus.
Movent bene sos locales chi andant in vantàgiu deretu cun Di Gennaro. Su tzentrocampista nche collit unu passàgiu traessu de Murru e a su de duos minutos nche ponet sa botza palas a Tatarusanu. Su Casteddu poderat, ma sa Fiorentina creschet semper de prus. A su de 20 minutos arribat su parègiu de Kalinic, pagu prus o mancu a sa matessi manera de su vantàgiu sardu: passàgiu traessu de Tello e botza in sa conca de su croatu chi, a sa sola, non faddit. Finas a sa pàusa sos istràngios si nche pigant su controllu de sa partida marchende·nche àteros tres gol. A su de 26 Bernardeschi si nch'ismarcat bene e raddòpiat, cun sa defensa casteddaja firma. A su de 32 est torra Bernardeschi su protagonista. Cun un'ischìtzina dae foras de s'àrea intzegat a Storari. Su de bator, imbetzes, lu firmat Kalinic cun unu mànchinu a su primu palu.
Su segundu tempus sighit semper sa matessi andàina. A su de 53, semper Kalinic, cun sa conca, nche marcat sa tripleta sua personale giughe·nde·nche su resurtadu a su 1-5. Su Casteddu però non si rendet e chircat de nche serrare sa partida cun dinnidade. A su de 62 Capuano nche marcat sa de duos pro sos ruju-biaitos e Borriello a su de 77 sa de tres. Ambos in sa matessi manera, cun passàgios traessos ingendrados dae tiros dae su cugione. No li bastant custos corfos a su Casteddu pro pònnere anneu a sos òmines de Paulo Sousa. Sa partida acabbat 3-5.
Formatziones
Casteddu: Storari, Murru, Bruno Alves, Salamon (58' Capuano), Pisacane, Tachtsidis (62' Barella), Padoin, Isla, Di Gennaro, Sau (68' Melchiorri), Borriello.
Allenadore: Massimo Rastelli
Fiorentina: Tatarusanu, Olivera, Astori, Rodriguez, Salcedo, Tello (88' Diks), Valero (65' Sanchez), Vecino, Bernardeschi, Ilicic (76' Hagi), Kalinic.
Allenadore: Paulo Sousa
Gol: 2' Di Gennaro, 20' Kalinic, 26' Bernardeschi, 32' Bernardeschi, 40' Kalinic, 53' Kalinic, 62' Capuano, 77' Borriello.
