Su durcore suo at conchistadu semper a totus e gasi etotu sas propiedades suas benèficas. S'importante est a lu seberare biològicu, sena pestitzidas, sena sustòntzias chìmicas e cun sas caraterìsticas organolèticas naturales.
Su sabore suo, in pare cun sos colores caentes e a sos riflessos dorados, cuntribuit a su benèssere e a sa felitzidade. Posca fintzas sas propiedades subra de s'organismu lu cunfirmant. Est un'alimentu ricu de enzimas, de proteinas, de vitaminas e de òligo-minerales. In prus est unu grandu energizante e istimulante. Sos polifenolos li permitint de àere podere antinframatòriu, antiossidante, depurativu, antibiòticu, lenitivu e lassativu.
De mele si nde produet genias meda, cada unu cun sas propiedades e cun sas caraterìsticas suas. Su tastu mudat cunforma a su logu de produtzione e cunforma a su frore chi servit s'abe pro nche sùere su mulaghe. Su mele de acàssia abarrat delicadu e resurtat grogu craru; su milli frores, imbetzes, chi si produet dae maju a trìulas, tenet unu tastu prus detzisu e su colore suo tirat a su craru; su mele de arantzu imbetzes bogat fragu de agrumes e si otenet in beranu; su de castàngia movet conca a su ruju, abarrat prus lìcuidu e tenet unu tastu prus forte.
Sas calidades sunt medas, dae s'eucalitu a s'iscrareu colende·nche a s'armidda o a su lidone. B'at petzi ite seberare.
