de Màuru Piredda
 |
| Url imàgine www.termometropolitico.it |
Swg
at ammaniadu una chirca intervistende 1000 tzitadinos italianos in
contu de sistemas econòmicos e de prospetivas de su tempus venidore.
Essit a campu una realidade anti-sistèmica chi at a pònnere a meledare
prus de un'analista. Su 32% de su campione narat de èssere
anti-capitalista; pro-capitalista su 25. Su 43 galu no l'ischit.
Diferèntzias
las agatamus pro su chi pertocat sa natura de sa crisi atuale: pro su
38% est transitòria e totu at a torrare comente fiat in antis de su
2008; pro su 27 podet peorare finas a nche cròmpere a una gherra
mundiale noa (sa de tres); pro su 19% est in crisi totale. Semper e
cando est in crisi pro s'84% de sos italianos e sa richesa in manos a
pagos paret chi siat sa càusa printzipale.
Su
35% pensat chi pro su venidore bi diat dèpere àere galu unu sistema de
mercadu lìberu, ma, inoghe puru (mancari partzida in tres visiones
diferentes) predòminat un'alternativa: de 100, 35 cherent un'economia
collaborativa; 33 un'economia de sa cooperatzione; 18 un'economia
pùblica. Galu, su 36% disìgiat unu modellu post-capitalista cun
un'economia prus armònica, solidale e cumpartzida.
A
sa pregonta "Ite tocat a mudare?", sos intervistados ant rispostu gosi:
a minimare su poderiu de sas grandu bancas e de sas finantziàrias
mundiales (46%); a favorèssere una prus ampra re-distributzione de sos
rèdditos (38); a limitare su poderiu de sas multinatzionales (35); a
nch'ismanniare su controllu de s'istadu in s'economia (12); a isvilupare
economias collaborativas noas (12).
In fines, su 31% de su campione pedit una polìtica noa chi diat prus poderiu a sos tzitadinos.
