Su Casteddu serrat su ritiru in Pejo cun una vitòria. Sa partida de oe fiat sa prima proa pro averguare sa preparatzione de sos ruju-biaitos. Difatis sa proa est interessante ca sos aversàrios sunt giai in dae in antis cun sa preparatzione atlètica bidu chi su 30 de custu mese, in Rùssia, cumintzat su campionadu.
Sos sardos nche tancant sa pràtica Terek giai dae sos primos minutos. Est Sau su protagonista. A su de chimbe minutos sos òmines de Rastelli òperant unu tiru dae su cugione. Sa botza nche crompet a sos pees de sos defensores chi però atzoroddant e cunsignant su vantàgiu a s'atacante tonaresu chi nche la devet petzi istichire a intro. Sos russos ant s'ocasione pro paregiare deretu cun Grozav, ma su tiru lìberu est artu. Su Casteddu giogat mègius e si faghet perigulosu in medas ocasiones cun Giannetti, Padoin e Joao Pedro.
Su segundu tempus est de àtera cunsistèntzia. Rastelli faghet sete càmbios e sa partida perdet in ispetàculu. Pagos sos perìgulos a un'ala e a s'àtera. A su de 73 minutos sos ruju-biaitos podent paregiare gràtzias a un'aterramentu de Pajac in s'àrea aversària, ma Farias si faghet parare su tiru de penalidade. Pagas sas emotziones in sos minutos chi abarrant.
Cras su Casteddu lassat su trentinu e torrat a Sardigna, in ue at a sighire sa preparatzione istadiale. Dae su 24 si cumintzat in Aritzo e su 28 a Casteddu arribat sa Pistoiese.
Formatziones
Casteddu: Storari (46’ Rafael), Pisacane (46’ Deiola), Ceppitelli (46’ Salamon), Capuano (46’ Krajnc), Murru (70’ Russu), Padoin, Di Gennaro (46’ Munari), Ionita (64’ Tetteh), Joao Pedro (60’ Pajac), Giannetti (46’ Cop), Sau (46’ Farias).
Allenadore: Massimo Rastelli
Terek Grozny: Godzyur, Utsiev, Semenov (64’ Musluev), Mohammadi, Pliev, Lebedenko, Piriz (80’ Sadaev), Ivanov, Kuzyaev, Grozav, Ablaye (60’ Mitrishev).
Allenatore: Rašid Rachimov
Gol: 5' Sau
