 |
A pustis de su parègiu cun s'ùrtima in classìfica sos sardos sunt obligados a bìnchere pro non pèrdere terrinu dae sa prima, su Crotone.
Movet bene su Casteddu giai dae sos primos minutos. A su de oto Sau nche marcat su vantàgiu. Sa botza, respinta cun sa conca dae Aquilanti, nche cròmpet a sos pees de su tonaresu chi, cun unu tiru a bolu, nche l'istichit a intro. 1-0. Su Lanciano imbetzes est perigulosu a su de 14 minutos, ma su tiru a paràbola de Ferrari nch'essit a foras. A su de 26 est Joao Pedro a pònnere sa tzudda a Cragno chi parat in duas bortas. Sau at sa possibilidade de raddopiare a su de 36 minutos, ma sa botza carignat su palu e nch'essit a foras. A pustis de duos minutos arribat su parègiu de sos istràngios. Vastola òperat unu passàgiu verticale pro Ferrari chi, nche brincat a Ceppitelli e sicat a Storari. Su portieri nemmancu si movet.
In su segundu tempus sos abrutzesos parent prus ischidos. Ant una paja de ocasiones a su de 49 e a su de 53 minutos, ma su tiru de Vastola no est pretzisu e su de Di Francesco nch'iscudet a sa traessa. Sa partida a bellu a bellu paret istudende·si·nche. B'at tempus pro unu tiru de Fossati a su de 84 minutos, ma Cragno parat. Acabbat gasi, cun unu parègiu chi non cuntentat a nemos.
Su Casteddu podiat mantènnere su ligàmene de duos pintos cun su Crotone, ma su parègiu de oe aumentat s'isvantàgiu a bator puntos. Sos calabresos ant bìnchidu 2-0 contra a su Como. Sos òmines de rastelli diant cumintzare a si pompiare a palas ca fintzas su Trapani nch'at collidu tres puntos e como est petzi a oto puntos dae sos sardos.
Formatziones
Casteddu: Storari, Murru, Capuano, Ceppitelli (46' Salamon), Pisacane, Deiola, Joao Pedro, Di Gennaro (54' Fossati), Munari, Sau (68' Tello), Giannetti.
Allenadore: Massimo Rastelli
Lanciano: Cragno, Salviato, Aquilanti, Amenta, Di Matteo, Vastola (80' Giandonato), Bacinovic, Rocca, Marilungo, Di Francesco (86' Milinkovic), Ferrari.
Allenadore: Maragliulo Primo
Gol: 8' Sau, 38' Ferrari
