Cras dae Casteddu a sas 10:45, at a mòvere conca a Tàtari, pro sa prima borta in manera ufitziale, su trenu nou a assetu variàbile. A sa presentada ant a leare parte su presidente de sa Regione in pare cun s'assessore de sos Trasportos e sos dirigentes de Fsi. Su mese coladu s'Agentzia natzionale pro sa seguresa ferroviària aiat autorizadu s'impreu de sos trenos noos pro sa lìnia Casteddu-Tàtari.
A Sardigna b'at arribadu giai 5 mezos de sos 8 prevìdidos chi ant a pòdere biagiare fintzas a 180 chilòmetros a s'ora, ma no in su tretu sardu. Sa ferrovia tenet problemas istruturales chi at a tocare a nch'isòrvere cantu prus in presse e pro custu, sa velotzidade prus arta at a èssere de 150 in ue su percursu lu permitit. Su presidente Frantziscu Pìgliaru a tempus suo aiat naradu - “Un'àteru passu de importu pro garantire a sos sardos una mègius mobilidade interna, l'amus fatu: su tempus chi b'at a pònnere unu trenu deretu intre Casteddu e Tàtari si nch'at a torrare a duas oras e mesu”.
Làstima però chi sos problemas istruturales non sunt sos ùnicos a lis dare anneu a sos biagiadores. Sos utentes de sa roda ferrada si nd'ant a cuntentare de sa comodidade e de sa bellesa de sos trenos noos, ma sos problemas primàrgios abarrant. Sas istatziones sunt bòidas, sena assistèntzia peruna, paritzas sunt abbandonadas e su trenu mancu si bi firmat prus. Àtera chistione chi punghet sunt sos oràrios, sos ritardos medas bortas sunt de mesoras e de oras, un'ispantu si si pensat chi b'at petzi unu binàriu de gestire. Pro como, sos trenos noos ant a èssere lestros cantu cherimus, ma ant a èssere petzi unu gùtiu in intro de una tatza bòida.
