de Màuru Piredda
 |
| Deretos Afp. Url imàgine |
Sajida
Ali, siriana, aiat sceti chimbe annos. Agigu prus manna de Aylan, su
pipiu curdu agatadu in sa marina de Bodrum, in Turchia. Che a Aylan,
Sajida at àpidu sa matessi sorte mala, lassende·nche in mare is isperas e
sa vida sua. Dd'ant agatada a issa puru in una plaja, in Cesme, semper
in Turchia.
Sa noa est de carchi ora ma non paret chi siat
girende in sas retes sotziales, forsis a cajone de una farta: sa de sa
fotografia. O mègius, is fotografias. Ca in is oras coladas no est morta
petzi Sajida, ma àteros ses pipios che a issa. Is undas de su mare Egeu
nch'ant bortuladu unu barcone chi fiat movende conca a sa Grètzia. Is
migrantes, oto is chi sunt renèssidos a si sarbare, beniant dae
s'Afghanistan.
Su mare sighit, duncas, a èssere una tumba pro
chie chircat unu venidore diferente e dinnu. Imoe non mancat chie,
comente chi nch'esseret faghende calare sa puntina in su discu, faeddat
de corridòios umanitàrios.
Ma non nch'at coladu tempus meda dae
cando Ue e Turchia ant firmadu un acordu chi est che a una rughe mala in
is palas de is migrantes. Su guvernu de Erdogan (e gasi aiant fatu cun
Gheddafi) at a retzire 3 milliardos (ma sa tzifra podet crèschere) pro
su "controllu de is flussos migratòrios". Est a nàrrere, pro nch'arreare
is migrantes in sa làcana cun sa Sìria e ddis impedire de nche cròmpere
a Europa.
