 |
| Deretos Ansa/Epa URL imàgine |
Sas categorias mentales sunt lestras a nàschere e malas a mòrrere, est cosa nòdida. Pro nàrrere, a un'ala tenimus su mundu otzidentale e a s'àtera s'oriente. Cun totu sas declinatziones issoro e su caràtere marcadu cun diferèntzias a bias opostas e in cunflitu. Si lu dat su sese chi pro nois siant mègius s'annestru e sa tzivilidade nostras e pro su mundu orientale siant sos issoro. E dae inoghe est totu una trempa, mala a nch'agrugare. Una làcana chi paret impossìbile a nche la barigare o peus a nche la derrùere. Sunt tzivilidades. Seculares o reghentes, semper categorias sunt e s'òmine no est dispostu a tzèdere o a si rèndere a s'angena. E forsis est finas cosa giusta comente est cosa giusta però a si cunfrontare e a chircare puntos de mesania e de connoschèntzia funduda de sas ideas angenas. Sena pro custu renuntziare a totu, ma petzi a su chi punnat a nos ischirriare e no a nos aunire. E sena impònnere cun sa fortza nudda a nemos. Paràulas, faeddos, ipòtesis e forsis bisos ebbia.
Eris, pro nàrrere, in Aràbia saudita si votaiat pro sas munitzipales e, pro sa prima borta in s'istòria issoro, ant votadu e ant pòdidu èssere elègidas fintzas sas fèminas. Torrende a sas categorias mentales, pro nois est unu deretu achiridu dae meda mannu e pensamus chi non siat ne una novidade, ne unu fatu dinnu de mentovu. Ma si pompiamus a dae segus nos abbigiamus chi in Itàlia sas fèminas ant otentu su deretu de votu una die a gianteris. Est a nàrrere in su 1945 cun s'aventu de su sufràgiu universale. Ma ant votadu in sa realidade pro sa prima bia, petzi su 2 de làmpadas de su 1946. Pro su Referendum istitutzionale monarchia-repùblica. In pessu setanta annos a oe. Como, lassende·nche a un’ala su ladus criminale e prus chi no iscumproadu de su paisu chi semus esaminende, lassende sas trassas polìticas e sotziales suas chi nos nche lu ponent in su chirru de sos peus, podimus a su matessi tempus ammìtere chi nois amus sa tendèntzia a nos nche cunsiderare sèculos e sèculos a dae in antis. E in su chirru de sos bonos. Sena abbaidare su chi semus. Sena anneu perunu pro su chi pretendimus dae àtere. E sena pensamentos pro nos impònnere in terra angena. Categorias mentales, pròpiu.
«In Aràbia saudita sunt a su nessi bator sas fèminas elègidas eris in sa munitzipales. Unu votu e unu resurtadu istòricu», iscriet Al Jazeera mentovende sos mèdios de imprenta locale. «No est fàtzile a agatare noas prus serentes e fundudas, a dae chi s'imprenta saudita no at dadu risaltu a sa chistione. Nessi non comente a su chi s’otzidente s’isetaiat».Su contègiu de sas ischedas paret chi siat galu in èssere. «Ma - agiunghet semper Al Jazeera - cunforma a sos primos datos isparghinados, paret chi siant duas sas fèminas chi ant otènnidu su sègiu in sos consìgios comunales de su guvernadoradu de Ihsaa. E àteras duas, una in su consìgiu de Tobouk e una in su de sa Mecca». Sas eletziones de eris in Aràbia saudita, repitimus, sunt istadas sas primas in ue sas fèminas podiant votare e èssere elègidas. Unu grandu passu a dae in antis pro totu s'umanidade.
