A pustis de 51 dies dae is eletziones natzionales, su presidente de sa repùblica lusitana at disinnadu de dare s'incàrrigu guvernativu a Antonio Costa, sa ghia de is sotzialistas portughesos. Unu sèberu a mala bògia a dae chi Cavaco Silva fiat contràriu a custa possibilidade, surdu finas a s'ùrtimu cunforma a chie chistionaiat de golpe.
Is
sotzialistas, est pretzisu a dd'ammentare, no aiant bìnchidu is
eletziones, ma, cun su sustennu parlamentare de is àteras fortzas de
manca, podiant àere is nùmeros pro guvernare. E gasi at a èssere,
mancari su Partidu comunista, is birdes e su Bloco de Esquerda no ant a
tènnere incàrrigos ministeriales.
A su chi si narat, su programa de
guvernu diat dèvere èssere collocadu prus a manca de s'atzione polìtica
de is àteros guvernos ghiados dae is apenditzes de su Partidu
sotzialista europeu (Pd in Itàlia e Ps in Frantza): mesuras pro
afortiare su poderiu de achistu, garantzias prus mannas in contu de
deretos laborales, 35 oras de traballu in su setore pùblicu, mèngua
(cando non s'abolitzione) de is cuotas personales sanitàrias,
interrutzione de is protzessos de privatizatzione sena nche pònnere a
banda sa chistione de is deretos tziviles.
A bìdere istemus.
