 |
| Deretos, debuglies.com. Url imàgine |
Benyamin Netanyahu eris at dadu s'òrdine pro «torrare
a esaminare sas cunditziones de su traballu comunu intre sas
istitutziones europeas e Israele, pro su chi pertocat su protzessu conca
a sa paghe cun sa Palestina». Acabbada sa sètzida at leadu su disinnu de «suspèndere sos cuntatos diplomàticos» cun
sas matessi istitutziones e cun sos rapresentantes issoro a cajone de
s'etichetadura de sos produtos fraigados in sas colònias israelianas.
Etichetaduras de identificatzione impostas dae sa Ue.
In una
nota de s'addetu a s'imprenta de su ministèriu pro sos raportos cun
s'èsteru (dicastèriu chi - ammentamus - in Israele est ad interim in manos a Netanyahu) si dat a intèndere chi sa mossa pertocat su protzessu de paghe ebbia. «Israele at a mantènnere sos cuntatos diplomàticos - si leghet galu in sa nota - cun sos Paisos sìngulos. Comente sa Germània, sa Frantza e su Rennu unidu, ma non cun sas istitutziones europeas».
Martis
in pessu coladu, sero sero, Netanyahu aiat addobiadu, in Washington,
unos cantos senadores americanos de ambas àreas polìticas e los aiat
impuntzados pro chi sustennerent a Israele e pro chi l'agiudarent a si
defensare dae s'imponimentu de s'Unione europea chi esigit sas etichetas
de orìgine controllada, in sos produtos de sa Cisgiordània. Sos
senadores, fiant 36, nch'ant imbiadu tando una lìtera ufitziale a
Federica Mogherini, chescende·si e protestende contra a su chi ant
definidu unu «boicotàgiu de facto» contra a Israele.
Unas cantas pregontas e unu cunsideru.
A ite consultare sos Istados unidos si sa collaboratzione conca a sa
paghe israelo-palestinesa est istada aviada cun s'Unione europea? A ite
intzidiare su parlamentu americanu pro intertzèdere in una chistione
chi naschet , bivet e diat dèvere mòrrere intre Israele e s'Ue? Ca
forsis s'Ue no est bastante forte, no est bastante echilibrada o - in
contu de polìtica – no est istitutzione fidada? Ca imbetzes, pro
Netanyahu, amus bidu chi sa Germània, sa Frantza e su Rennu Unidu sunt
dèghidas, a dae chi las at mentovadas comente intermediàrios de gabbale.
O b'at forsis àteros sentidos chi nen s'Europa, ne Israele ant bogadu
galu a pìgiu? Sas etichetas impostas da s'Ue pertocant petzi sos
produtos de sas colònias israelianas. Sas colònias - s'ischit - sunt
semper sutamìtidas. E a s'Istadu dominante, mescamente si est de
màdrighe imperialista, no l'agradant nen sas crìticas, nen chi si
pòngiat s'atzentu subra su sentidu de sas atziones polìticas e sotziales
suas. Sunt sas suas e nemos diat dèvere intervènnere. Est - mutatis mutandis -
su chi acontesset fintzas in Itàlia versus sa Sardigna. Pregontas
retòricas, duncas o giustificadas? Cunsideru retòricu o serente?
