 |
| Deretos lìberos. Url imàgine |
Unu disafiu mannu
cun 150 cabos de istadu e de guvernu. Est custu su Cop21, sa de bintunu
cunferèntzias de sas Natziones unidas subra de su clima. Sa punna est
cussa de nche cròmpere a un'acordu istòricu chi pòngiat unu frenu a
s'iscardamentu climàticu de su praneta, a manera de evitare su disacatu
prus mannu de semper.
Parigi est armada, serrada, sigillada. Oe a
sas 11:00 su presidente frantzesu Hollande in pare cun su segretàriu de
sas Natziones Unidas Ban Ki-moon at a addobiare a Obama, Putin, Jinping,
Modi e àteros. S'acordu chi devet definire sa comunidade
internatzionale punnat a limitare s'iscardamentu globale a duos grados
cunforma a sos livellos de su tempus pre-industriale. Sa comunidade
sientìfica oramai non tenet dudas, barighende·nche custa làcana, sa
Terra at a mudare semper de prus, su clima suo cun cunsighèntzias graes
pro totus.
Sos paisos chi ant a leare parte a sa cunferèntzia ant
giai presentadu sos progetos issoro pro ridùere s'incuinamentu, ma no
sunt bastantes ca nche diant giùghere su praneta a un'iscardamentu de
tres grados. S'addòbiu de oe est s'ùrtima possibilidade pro chircare de
revisionare sos càrculos antepostos e pro abratzare su caminu de sa
sustenibilidade furriende sa tendèntzia.
Sos traballos ant a durare finas a s'11 de nadale.
