Sa fùria de sos elementos. Firentze torra suta s'abba

de Maurìtziu Sale

Una temporada mala. Abba, gràndine e ufuladas de bentu ispantosas, ant abrancadu eris sa tzitade de Firentze. Allagamentos, àrbores irraighinados e pessones in perìgulu de vida sunt tenende impinnadas sas iscuadras de sos vìgiles de su fogu. Sas autoridades ant rechestu finas agiudu e rinfortzos dae su Comune de Pradu e dae Pistòia, pro pòdere parare fronte a su disacatu e a totu sas rechestas de interventu. Su livellu de s'Arnu s'est artziadu de paritzas unidades e gente meda fiat timende·si un'àteru 1966.

Sa buriana at corfadu in particulare sa parte bassa de sa tzitade. Su tràficu, suta s'impèllida de su terrore at aumentadu finas a s'arressare de su totu. A corfu. In totue. Sos suta-passàgios fiant inundados, impraticàbiles. Petzi a ora de sas tres, in intro de note e proende galu a ìrrida, ant torradu a ativare sas ferrovias pro Roma.

"Non sigais a impreare sas màchinas, mescamente in sos bighinados 2 e 3" fiat s'avisu isparghinadu in Twitter dae su Vitzesìndigu Cristina Giachi in pare cun su Cumandante de sa Politzia Munitzipale chi sunt punnende a bonu garbu, ma cun dificultades mannas a cuntènnere sa confusione e sa timòria chi una situatzione de emergèntzia che a custa ingendrat in cada chirru e in cada domo. Finas a como paret chi non b'apat àpidu vìtimas o fertos a manera grae.

Semper prus frecuentes sunt sas temporadas de custa genia chi su pòpulu at batijadu "bombas de abba" e chi sos iscientziados galu non bi reventent a acrarire. Cun s'ispera chi cantu prus in antis sa temporada potzat èssere petzi un'ammentu auguramus sa bona sorte a totu sos fiorentinos e nos istringhimus finas a sos nostros chi, in Sardigna, sunt galu gherrende sena prus domo, cun sa burocratzia e cun sos pantasmas de santandria.