de Màuru Piredda
Nch'at coladu 35 annos dae cando is lantzitas de su relògiu de
s'istatzione de Bologna sunt firmas a is 10.25 de mangianu. In is
pàginas de s'istòria italiana, su de su 2 de austu de su 1980 sighit a
rapresentare s'acadessimentu terrorìsticu prus grae de su segundu
perìodu postbèllicu: «Non tèngio paràulas – aiat naradu su presidente de sa Repùblica de tando, Sandro Pertini – semus cara a sa faina prus criminale acadèssida in Itàlia». |
| Wikipedia |
A su matessi tempus custu degòlliu (cun 85 mortos e prus de 200
feridos) sighit a abarrare impunidu. Ddoe at una beridade chi is
bolognesos e is democràticos connoschent, ma galu no ddoe at una
beridade giuditziària chi reconnoscat is mandantes, intre fàulas e
depistàgios. Che a cada 2 de austu sa Bologna antifascista s'est
imbènnida in pratza pro no ismentigare e pro pedire giustìtzia. Su
presidente atuale de sa Repùblica, Sergio Mattarella, at naradu tràmite
unu telegramma, chi «is vìtimas innotzentes sunt oramai parte de sa memòria natzionale».
Ma ddoe at àpidu chie – comente a Paolo Bolognesi de s'assòtziu de is
familiares de is vìtimas - at pronuntziadu paràulas graes contra a unu
istadu «chi in custos 35annos nos aiat dèvidu amparare». Bolognesi, chi est finamentas unu parlamentare de su Pd, at agiuntu chi «sa
lege chi introduit su reatu penale de depistàgiu nch'est in intro de
unu calàsciu nointames is apellos nostros pro chi bèngiat aprovada». Custa chistione at ingendradu sa polèmica intre su Pd e su M5S: pro Alessandro Di Battista, parlamentare pentisteddadu, «su retau de depistàgiu no est una prioridade de custu guvernu».
