de Màuru Piredda
Ocupatzione, lìmite de povertade, richesa produida: sunt graes meda is
datos chi essint a campu dae su raportu 2014 (cunforma a s'annu in
antis) de su Svimez, su sòtziu pro s'isvilupu de s'indùstria in su
meridione. In contu de traballu, intre su 2012 e su 2013, in Sardigna
ddoe at àpidu 43mìgia (su 7,3%) ocupados de mancu. Su tassu de
disocupatzione nche crompet a su 25,4% (a su 54% pro is giòvanos suta de
is 24 annos de edade).
In su setore de sa manifatura ddoe at àpidu
belle unu millione de oras de cassa integratzione. Datos chi podent
acrarire su proite belle su 25% de is famìlias sardas nch'est a làcana
cun sa cunditzione de povertade. Prus bassu su produtu internu brutu (su
Pil) cunforma a su 2012: su 4,4% de mancu. Gasi etotu is
esportatziones: - 15,5%. Male s'edilìtzia, s'indùstria e is servìtzios.
Bene isceti s'agricultura (+2% de ocupados)
