4,8 milliones de èuros: est su chi at postu sa Giunta Regionale in contu de polìticas de su traballu cunforma a su progetu LavoRas, nàschidu cun s'idea de pònnere gente a traballare e de amparare sos livellos de ocupatzione.
«Sunt finantziamentos de importu cun duos efetos positivos: sas Comunas ant a pòdere contribuire a sa defensa de su pretziosu patrimòniu de litos chi b'amus, bidende·lu fintzas comente servìtziu contra a sos fogos, cramende una filera de operadores pro interventos selvi-colturales, rimboschimentos, traballos fitosanitàrios e traballos de manutentzione de sa viabilidade agro-silvo-pastorale. Un'àlenu de ossìgenu pro sos chi ant pèrdidu su traballu e un'atzione de tutela de s'ambiente». Gasi at naradu Donatella Ispano, isprichende a sos mèdios massivos custas resursas istantziadas pro unas chentu amministratziones locales chi ant bidu minimare sos ocupados in su setore de sa forestatzione.
Sas comunas ant a pòdere assentare gente in duas maneras: o pro mèdiu de cantieris comunales “birdes” o afidende sos cantieris a cooperativas sotziales de tipu B, chi sunt cooperativas forestales cunforma sas normas chi bi sunt in matèria.
