Su 22 de martzu si festat sa Die Mundiale de s'Abba (in inglesu World Water Day), istituida su 1992 dae s'Assemblea de sa Natziones unidas in intro de su programma Agenda 21, su manuale de isvilupu sustenìbile chi movet dae sas diretivas de sa Cunferèntzia de Rio.
Sa punna est sa de ammentare a sos istados de s'Onu sos impignos chi s'ant leadu. Mescamente pro pònnere a disponimentu de totus s'abba durche e sa sustenibilidade de sos ambientes naturales, promovende atividades de sensibilizatzione e de informatzione.
Su tema de su 2018 est “Sa Natura de s'Abba” e proponet de prevènnere alluviones, sicagnas e incuinamentos impitende solutziones chi bi sunt giai in natura. Est semper prus craru chi sas crisis ìdricas chi nde bogant abba potàbile a sas populatziones sunt ligadas a filu dòpiu e, a dolu mannu, a nodu mortu a sos dannos ambientales e a sos mudamentos climàticos, chi produent fintzas impoverida de sos terrinos, de sos rios e de sos lagos e duncas de sos ecosistemas.
Sa solutzione diat pàrrere una ebbia: sa tutela e s'amparu de su tziclu naturale de s'abba, chirchende de mediare sas infrastruturas “birdes” cun sas “mùrinas”, investende in sos padentes e in sas zonas ùmidas e dende fintzas unu reconnoschimentu giurìdicu internatzionale comente benes titulares de deretos universales ,a elementos naturales che a s'abba, a su terrinu e a sos rios .
