 |
| Dominique Moret/FTVIASTELLA |
S'Assemblea de Còrsica, elègida su mese coladu, at tentu petzi su tempus de giurare subra de sa Costitutzione corsicana de su 1755 in antis de retzire sa vìsita de Jacqueline Gourault, rapresentante de su Ministeru de s'internu.
Sa senadora, cun su còmpitu de compilare unu raportu subra de sa Còrsica, at addobiadu su presidente de s'esecutivu Gilles Simeoni e a su de s'Assemblea Jean-Guy Talamoni. B'at bentu nou in Frantza. Su presidente de sa Repùblica, Macron, est traballende pro una riforma costitutzionale chi siat capatza de s'adatare a sos territòrios. «Ischimus chi sa Frantza tenet diferèntzias meda – at naradu Gournault – e ischimus fintzas chi sa Còrsica tenet un'ispetzifitzidade sua. Pro custu amus a fàghere a manera chi sas leges s'adatent a sa realidade de sos territòrios».
Singiales de abertura, sos de sa rapresentante frantzesa, chi s'arressant cando si faeddat de coufitzialidade linguìstica. Su guvernu de Parigi timet chi una cuntzessione de importu che a sa de sa limba potzat pònnere in perìgulu s'unidade de s'istadu. «Connosco s'istima de sos corsicanos pro sa limba issoro chi cherent chi si faeddet e chi abarret semper bia in su tempus. Ma sa limba de sa Repùblica est su frantzesu!». Paràulas a istruncadura chi nche derruent una de sas batallas primàrgias de sos natzionalistas isulanos e chi ant segugiadu sa reatzione de unos cantos linguistas.
