Su Consìgiu de sos ministros at aprovadu su decretu chi òbligat a vatzinare sos pitzinnos in antis de s'iscritzione a iscola. S'intervallu de edade in discussione est su chi andat dae sos 0 a sos 6 annos. Sena vatzinos sos pitzinnos non si nch'ant a pòdere marcare a sas iscolas de infàntzia e a sas iscolas maternas.
Sa norma, chi at a intrare in vigore dae s'annu iscolàsticu imbeniente, previdit santziones finas a 30 bortas superiores a sas atuales. Su guvernu, cun custu provedimentu, at chertu dare una lìnia generale a sas regiones e, in su matessi tempus, at chertu cuntrastare sa difusione de teorias anti-iscientìficas chi ant cajonadu sa mèngua de sos livellos de amparu. Sa lista de sos vatzinos obligatòrios est bastante madura, sunt 12 in totu: tùssiu caninu, difterite, poliomelite, tètanu, emòfilu b, epatite b, meningite b, meningite c, russete, urtigada, tuturrones e pigota burda.
A pustis de sos ses annos s'iscola elementare at a comunicare a sa Asl sos datos de sas famìlias chi non sunt in règula e lis at a cuntzèdere unas cantas dies pro s'adeguare a sa diretiva. In casu contràriu s'Azienda sanitària at a multare sas famìlias reberdes cun santziones chi ant a cròmpere finas a 7.500 €. In prus, su tribunale de sos minores at a pòdere suspèndere sa potestade genitoriale.
