 |
| Imàgine pigada dae mragnedda.wordpress.com |
«Su 2017 at a èssere difìtzile meda. A dolu
mannu, ant a crèschere sos atentados terrorìsticos in totue. Primos
obietivos sa Rùssia (in cada logu tèngiat interessos), sa Turchia e
s'Europa in generale». Lu narat Màssimu Ragnedda, dotzente universitàriu
sardu e espertu de comunicatzione e de polìtica internatzionale. Pro
more de ite? Pro more «de sa torrada a domo de sos cumbatentes
istràngios dae sa Sìria. In sos chimbe
annos colados Iua e Europa (Rennu unidu, Frantza e Germània), in pare
cun sos turcos e sas petroditaturas, ant annestradu, armadu e sustènnidu
sos terroristas lòmpidos a Sìria dae mesu mundu. A pustis de sa
liberatzione de Alepu gràtzias a sos russos, a sos iranianos e a sas
trupas sirianas, custos terroristas (“reberdes” pro sos mèdios
otzidentales) cun passaportu europeu, tzetzenu, australianu,
istadunidense etc. si nch'ant a torrare a sos paisos issoro giughende·si
in fatu s'annestru militare, ideològicu e istratègicu».
Pro su chi pertocat sa Turchia, Ragnedda narat chi «est comintzende a
nde boddire sas supas». S'assàchiu a sa discoteca de Instanbul «est su primu, ispero chi nono, de una sèrie longa». Tres
chistiones iscùrigant su chelu anatòlicu: s'iscontzu de sas fortzas de
seguresa dae banda de Erdogan «pro cuntrastare a Gulan»; sa dificultade
de controllare chie intrat a Turchia dae sa làcana siriana;
s'acostamentu de Türkiye Cumhuriyeti a su Cremlinu, cosa chi «no agradat
a sa Nato». Sa Rùssia – annanghet Ragnedda – sighit a èssere «sa mira
punnada dae sos terroristas Isis e tzetzenos e dae sos servìtzios
segretos (saudidos e americanos in primis) chi los controllant». E pro
su chi pertocat s'Europa? «A chentinas sunt torrende. Una parte at
cansiadu sos radar e sos servìtzios e diant pòdere corfare in cale si
siat momentu». Previsione a sa Nostradamus? «Nono – cùngiat Ragnedda –,
totu custu l'ischìamus e cheriat contadu. Sos mèdios no l'ant fatu e a
cuare custas informatziones est comente a nàrrere fàulas».
