de Màuru Piredda
 |
| Deretos lìberos. Url imàgine |
Sos ativistas
de su Movimentu 5 isteddos ant votadu su venidore issoro in su
Parlamentu europeu. Eris, a sas 10.00 de mangianu, Beppe Grillo aiat
abertu sas votatziones tràmite un'artìculu/cramada in su blog suo: dae
sas 10.00 (duncas sena preavisu perunu e sena dibata propedèutica)
fintzas a sas 19.00 e dae sas 10.00 de oe fintzas a mesudie. Tres
possibilidades: a nch'intrare a su grupu liberal-democràticu de Guy
Verhofstadt (s'Alde); a nch'intrare a su grupu de sos chi non sunt
iscritos; a nch'abarrare in s'Efdd (Europa de libertade e democratzia
dereta) cun s'Ukip.
S'artìculu publicadu fiat prus chi no un'indiritzu
pro sos ativistas: «A pigare parte a unu grupu polìticu cheret nàrrere a
àere deretu de paràula in sas sessiones plenàrias de su Parlamentu; a
èssere rapresentados in intro de sa Cunferèntzia de sos presidentes; a
àere sa possibilidade de sighire s'iter legislativu comente autores de
regulamentos europeos; a òtennere dinare de gastare in su territòriu pro
sas atividades de infromatzione e de formatzione indiritzadas a sos
tzitadinos italianos e europeos».
Duncas duas ebbia fiant sas optziones:
o in s'Efdd o in s'Alde. Ma «s'Ukip at segudadu s'obietivu suo», sa
Brexit, e s'Alde «cun sa presèntzia de su Movimentu 5 isteddos diat
devènnere sa de tres fortzas polìticas. Cheret nàrrere a achirire unu
pesu ispetzìficu de importu mannu in sos disinnos chi s'ant a pigare».
Mentovadas unas cantas cunditziones in contu de «trasparèntzia»,
«autonomia in su votu», «semplificatzione» e «immigrazione». Annuntziada
in prospetiva, forsis pro assussegare sos suos (in paritzos assustados
pro custa furriada), sa nàschida de una «identidade noa europea». Su
nùmene? Seberadu dae como, sena votu: Ddm, Direct democracy movement.
Su
votu fiat eris e oe, e sa majoria de sos grillinos (belle s'80% in sa prataforma "Rousseau") at sighidu
s'indiritzu de su majorale.
