Sàbadu chi benit, su 14, ant a èssere duos sos eventos de importu pro su chi pertocat sa Limba sarda. Eventos conca a s’impreu fitianu suo in s’allega e in s’iscritura.
In Irgoli, a
sas deghe e mesa, in sa Sala de su Consìgiu comunale, carrera de Roma 1,
sa premiatzione de sos binchidores de su cuncursu in ammentu de
s'iscritore e giornalista "Giuanne Frantziscu Pintore”.
Cròmpidu a sa de
tres editziones, su cuncursu, ideadu e organizadu
dae Papiros editziones, est dedicadu a su giornalista e iscritore chi,
ammentamus, fiat nàschidu pròpiu in Irgoli su 1939 e chi, làstima manna,
s’est rèndidu in Nùgoro su 2012.
Duas sas setziones de ocannu: sa
Setzione generale, a ue podiant leare parte autores de cale si siat
edade, prèmiat sos tres artìculos mègius cun 250€ cadaunu e sa Setzione
istudentes de iscola mèdia, a ue podiant cuncùrrere sas classes de sas
iscolas mèdias inferiores de totu sa Sardigna, prèmiat sos tres
artìculos mègius cun 300€ cadaunu.
Ma sa novidade de sàbadu chi benit, est sa Cunferèntzia aberta de
su sardu. S’eventu, istruturadu cun su mèdiu de sas mesas de istùdiu,
ammaniadu dae su sòtziu Acordu, at a èssere in sa sede de su Ex Mè in
Nùgoro, in sa pratza de su mercadu.
At a mòvere dae sas noe de mangianu e
s’at a istèrrere fintzas a sas oto de sero. Sa cunferèntzia - a su chi
si leghet in su comunicadu ufitziale de Acordu – tenet una punna ebbia:
sa paridade, in Sardigna, de su sardu cun s’italianu.
Sos organizadores,
semper in su comunicadu, puntualizant fintzas chi sunt «indipendentes e
de cale si siat apartenèntzia». Faeddos agigu sibillinos, ma chi
lassant cumprèndere chi non b’apat perunu ligàmene polìticu dislindadu e
chi sa cunferèntzia siat aberta a chie si siat bògiat intervènnere cun
su contributu suo.
Oto sas temàticas pertocadas in s’addòbiu. Inoghe
nd’ammentamus unas cantas ebbia: Arte e Limba sarda; Gender e Limba
sarda; Iscola e Universidade; Istandardizatzione. Sas àteras, in pare
cun su regulamentu pro leare parte a sa cunferèntzia, si podent agatare
in su situ www.acordu.eu.
