Cada tantu càpitat a totus de èssere licàngios e de disigiare unu pachete de patata frissa in sacheddu. Sa chi s'agatat in totu sas butegas de alimentares e chi, a bias, est aromatizada cun sa chibudda, cun sa pàprica o cun su romasinu. Alimentos chi diant chèrrere consumados sena nde fàghere abusu.
Una chirca reghente, ghiada dae sas biòlogas Elga Baviera e Sabina Rubini, at rilevadu una presèntzia tropu manna de acrilammide in su 50% de sas marcas analizadas. Sa cuntzentratzione de sa sustàntzia nche barigaiat sos valores de riferimentu de sas lìnias-ghia de s'Efsa (Autoridade europea pro sa seguresa alimentare). S'acrilammide est unu cumpostu cancerògenu chi cumparit cun sa fritura o cun sa cotura a temperaduras tropu artas, ma fintzas cun sos protzessos de trasformatzione industriale chi nche bàrigant sos 120° a umididade bassa. Sas proas sientìficas subra de sos animales ant dimustradu chi s'acrilamide e su metabolita suo, sa glitzidammide, sunt genotòssicas e cancerògenas, est a nàrrere chi faghent dannu a su DNA. Sas proas subra de s'òmine, imbetzes, galu non cumbinchent e sunt limitadas, duncas non b'est sa seguresa chi s'espositzione alimentare a s'acrilammide pròvochet su cancru.
Su Studio Abr at seberadu, in manera casuale, 6 campiones de patata e las at analizadas in su laboratòriu chìmicu mertzeològicu de sa càmera de cummèrtziu “Riviere di Liguria”. Sas marcas analizadas sunt: Amica Chips Eldorada, Carrefour classiche, Crocchias classiche terranica, Lays classiche senza glutine, Patasnack classica senza glutine, San Carlo 1936.
Tres marcas nch'ant barigadu sos valores de riferimentu de s'Efsa: Amica Chips Eldorada, Crocchias classiche terranica e Carrefour classiche. Sas àteras sunt resurtadas a norma.
«Diat tocare a dare prus cara a sa gestione de sos momentos de produtzione – narant sas biòlogas – a sos sèberos de protzessu, a sos trastes impreados e a sos mecanismos impreados dae sas aziendas. Tocat a la controllare sa fritura, averguende sa temperadura de s'ògiu e mudende·lu a s'ispissu».
