 |
| Deretos Papiros |
Nch'est cròmpidu a unu cuartu de sèculu su cuncursu in sardu pro pitzinnos de sas iscolas elementares Iscrie una lìtera a sos Tres Res. Sas binti lìteras prus curioseddas las at a publicare in unu libru s'editore nugoresu Papiros.
Agiuados dae sos maistros, sos istudiantes de sas elementares nch'ant imbiadu chentinas de lìteras in ue nos contant s'istòria issoro e sa de su chi fiat capitende in su mundu a rodeu de cussos annos. Gasi, in su cuncursu de su 1993, Antonella Puggioni, de Irgoli: «sa gherra, ieo la cussidero una cosa chi no serviti a nudda». Lisa Morittu de Silanos, imbetzes, in su 1996, «tenzo sos occhialese e sos pilos curzoso e soe unu pagu mala e mandrona». E in su 2007, Pàulu Murinu de Elini: «soe dispragiu po totu is cosas legias chi sussedent in custu mundu».
Lìteras chi faeddant de sa gherra in Somàlia, in sa ex Jugoslàvia, chi contant de su fàmene in su mundu e de sos pitzinnos pòberos. Rechestas chi arribant deretu dae su coro de sos pitzinnos chi pedint de fàghere sessare sas uras malas a rodeu de su praneta.
S'editzione de su 2017 rapresentat una novidade ca est nàschida cun unu finantziamentu colletivu chi est galu ativu e a ue totus bi podent leare parte. Sos fundos chi ant a collire sos organizadores ant a èssere gastados pro imprentare su libru de su 2017 e pro premiare sos binti pitzinnos chi ant a bìnchere.
Sa tzerimònia de premiatzione at a èssere in Nùgoro su 6 de ghennàrgiu de su 2017 a sas 10:30 de mangianu in sa Crèsia de su Rosàriu.
