de Màuru Piredda
 |
| Deretos Ap images. Url imàgine |
Istados unidos tintos a ruju, a su nessi pro
su chi pertocat su colore impreadu pro marcare sos republicanos in sa
cartina eletorale. Su capotatzu nieddu Donald Trump nch'at barigadu dae
pagas oras sos 270 delegados chi li bastaiant pro coronare su bisu de
nche cròmpere a sa Domo arva. A pustis de sa conchista de su Wisconsin e
de s'annùntziu de Associated Press, totu sos mèdios ant faeddadu de
vitòria republicana (finamentas pro su chi pertocat su Cungressu). Ispantu peri sos opinionistas de domo nostra chi como sunt aberende sa
gara de su “e como?”.
«At bìnchidu Trump – est unu de sos cumentos
essidos a campu intre sos prus irònicos de custu mangianu (giudìtziu
sugetivu, naturale) –, como sa politzia at a ochiere afroamericanos!». In
pagos ant pigadu in cunsideru sos faeddos de su regista Michael Moore.
Pro issu b'aiat chimbe resones a favore de Trump, pighemus·nde petzi
tres: su votu de protesta in sos istados “Brexit” (Michigan, Ohio,
Pennsylvania e Wisconsin) e sa retòrica protetzionista chi at prenadu su
bòidu lassadu a manca e dae sos sindacados; sa paga cunfiàntzia in
Hillary Clinton; sa mùtria mala de sos eletores de Sanders.
«Posta a
banda sa campagna eletorale – at naradu su presidente nou –, comintzat
como su traballu verdaderu. Istimo s'Amèrica e apo a traballare pro
bois».
Sa crisi americana est destinada a nch'intrare in una fae
noa. A pustis de sas derrotas peri su mundu, sa burghesia yankee perdet
finamentas in domo sua. Ma perdet contra a unu capitalista milliardàriu, contra a
unu reatzionàriu, a unu bonapartista. Farsa o tragèdia (pro mentovare a
Marx chi de bonapartismu "nde ghelaiat")? L'ant a nàrrere sos de Occupy
Wall Street, sos de Black lives matters, sos traballadores chi ant
comintzadu a s'acarare a sa polìtica nointamen su passu a in segus de
Sanders. A bìdere istemus.
