 |
| Deretos Luiseddu Caria |
Si sunt imbènnidos custu mangianu, cara a su polìgonu de Cabu Frasca, sos ativistas de su movimentu contra a s'ocupatzione militare de sa Sardigna. A sa manifestatzione si nch'at agiuntu fintzas paritzos movimentos indipendentistas e medas tzitadinos lìberos.
Sa protesta, chi at collidu adesiones dae totue, est acabbada petzi a ora de sas ses. Sa punna fiat sa de firmare sas esertzitatziones de oe in intro de su polìgonu. Sos ativistas, difatis, sunt resèssidos a istampare sa rete e a nche barigare sa làcana militare. In intro bi fiant sas iscuadras de sos carabineris e de sa politzia chi sunt intervènnidas deretu contra a sos manifestantes, ferrende·nde paritzos.
A borta de die su corteu at sighidu a caminare conca a su bidditzolu de Santu Antoni de Santadi, traessende·lu e movende ogros a s'Aschivoni.
«Oe b'at àpidu partetzipatzione manna mancari esseret die de servire – at naradu un'ativista de s'organizatzione – sa gherra contra a sa militarizatzione de s'ìsula est pighende cussèntzia e pro custu, in su benidore, amus a sighire cun àteras initziativas. Sighimus a pretèndere chi sas bases serrent, chi ativent sas bonìficas e chi sos territòrios torrent a sas comunidades locales».
