de Màuru Piredda
 |
| Deretos senato.it |
«Frantziscu (Pìgliaru, Ndr) istimadu […],
permiti·mi unu cuesitu: comente los interpretas su cabuversu de s'art.
17 de s'Istatutu nostru e s'art. 57 de su testu Renzi-Boschi-Verdini
cumbinados?». Andria Pubusa, ordinàriu de Deretu amministrativu e òmine
impinnadu pro su “No” a sa reforma costitutzionale, torrat a semenare
dudas in su campu de sos chi sunt pro su “Sì”. In sas dies coladas fiat
intervènnidu in contu de ispetzialidade istatutària, narende chi sa
clàusola de suprematzia pertocat finamentas a nois. «A cajone de
s'artìculu 17 – at iscritu oe in su situ democraziaoggi.it – tue e totu
sos consigeris regionales sardos no ais a pòdere èssere eletos, nen
numenados senadores. E, sigomente l'ischis, s'Istatutu sardu est lege
costitutzionale».
Pro Pubusa nemmancu sos sìndigos nch'at a
pòdere cròmpere a Palatu Madama: «Su matessi artìculu istabilit chi non
podet èssere consigeri regionale su sìndigu de una Comuna chi nche
bàrigat sos 10mìgia abitantes, duncas, a fortiori, non podet èssere
senadore». Mentovados, a ghisa de brulla, sos primos tzitadinos de
Deximumannu, de Serramanna, de Silìcua e de S'Ulumedu. «Ma forsis – at
annantu – pro Màssimu (Tzedda, Ndr) b'at un'ispera ca b'at unu
printzìpiu giurìdicu in ue si leghet chi sas limitatziones de
s'eletoradu passivu sunt de natura etzetzionale e non s'àplicant in
manera analògica a casos simigiantes chi non sunt prevìdidos in manera
crara».
Duncas, custa diat èssere sa contradditzione, «su
sìndigu de una Comuna cun prus de 10mìgia abitantes non podet fàghere su
consigeri regionale, ma su senadore, forsis, emmo». E boghe·nde·nche
s'incumpatibilidade (mudende s'Istatutu)? Male e peus, pro Pubusa: «In
su Senadu b'at a àere non petzi consigeris e sìndigos, ma
sìndigos-consigeris». Chistiones chi, a unu mese dae su referendum,
arrichint sa dibata. Semper chi si votet su 4 de nadale: cun sa còntiga
de su terremotu calicunu (comente Alfano) est pensende a àteras datas.
