In su Santu Elia est su turnu de s'Udinese chi arribat dae tres partidas sena bìnchere. Su Casteddu imbetzes at pèrdidu sas ùrtimas duas, incassende ses gol in totu. Su disafiu de oe previdet una proa bastante echilibrada e, difatis, resurtat gasi.
Sas formatziones si tratenent mescamente in sa zona de su tzentrocampu. Sa prima fase de giogu est intensa, ma non b'at perìgulos pro ambos sos portieris. Sos friulanos resurtant perigulosos a su de 8 minutos cun Fofana, ma su tiru suo a filu de terra, nch'essit a foras. Pro bìdere un'atzione interessante de su Casteddu tocat de isetare a su de 17 minutos. Borriello proat a tirare a porta, ma Karnezis parat sena problemas. Nche colat mesora, ma nemos resesset a pigare in manos su giogu. A su de 35 minutos Farias e Borriello, in su lìmite de s'àrea, si cuncàmbiant sa botza. Faina chi permitit a su giogadore brasilianu de si presentare cara a Karnezis chi li parat su pee. Pro s'àrbitru Pairetto non b'at dudas, est tiru de penalidade. Farias etotu si òcupat de sa trasformatzione e nche giughet sos suos in vantàgiu. A su de 39' torra s'atacante de su Casteddu, dae su ladus de manca, si nche fuet conca a sa porta aversària, ma su tiru est indiritzadu a sa rete esterna.
Su segundu tempus cumintzat cun su matessi ritmu de sos ùrtimos deghe minutos. Sos sardos ant sa possibilidade de raddopiare, ma Farias no incuadrat bene su cugione bassu de sa porta. S'Udinese parègiat cun Fofana a su de 51 minutos. Su giogadore frantzesu a pustis de una finta lassat mòvere unu bellu tiru deretu a su primu palu. Storari la tocat, ma sa botza nch'intrat etotu determinende su parègiu provisòriu. A su de 58 sos ruju-biaitos torrant in vantàgiu cun Sau. Isla, dae su ladus de dereta, isfrutat una botza chi pariat pèrdida e nche la ponet in mesu a s'àrea. S'atacante tonaresu est su prus lestru a nche cròmpere e, cun su carcàngiu, nche l'arrumbat a intro. S'Udinese non si rendet e a su de 66 minutos leat unu palu. S'autore de su tiru dae su lìmite de s'àrea est Théréau. Sos friulanos si nche presentant paritzas bortas in sos tretos de Storari, ma sa defensa casteddaja est atenta. A su de 82 minutos su Casteddu tenet un'àtera ocasione de importu cun Farias chi faghet unu passàgiu traessu a filu de terra pro Borriello. S'atacante napoletanu, chi nche fiat in mesu de s'àrea, tirat a corfu seguru ma su portieri li negat su gol. Su miràculu de Storari a su de 88 minutos descriet bene s'ispetàculu de sos ùrtimos minutos. Su portieri sardu s'isterret in totu su ladus mànchinu e negat su parègiu a Peñaranda. Sos chimbe minutos de recùperu non nos donant àteras emotziones. Petzi sos tres frùschios de s'àrbitru sentèntziant s'acabbu de su disafiu e sa vitòria de su Casteddu. Domìniga chi benit si giogat in Pescara.
Formatziones
Casteddu: Storari, Isla, Ceppitelli, Bruno Alves, Pisacane, Padoin, Di Gennaro (62' Bittante), Barella, Farias (87' Giannetti), Borriello, Sau (83' Salamon).
Allenadore: Massimo Rastelli
Udinese: Karnezis, Widmer (62' Faraoni), Wagué, Danilo, Adnan, Jankto, Kums, Fofana, Ryder Matos (63' Perica), Zapata (68' Peñaranda), Théréau.
Allenadore: Luigi Delneri
Gol: 35' Farias (p), 51' Fofana, 58' Sau
