 |
| Deretos Jethro J. Sérémé/American Red Cross/IFRC. Url imàgine |
S'uraganu chi at bisestradu s'ìsula de Haiti at cajonadu prus de 1.000 mortos. Est custu su bilantzu provisòriu a bator dies dae sa disaura. Su National weather service americanu at naradu chi diat pòdere èssere istada sa temporada prus grae de sos ùrtimos 118 annos.
Sos bentos fortes, a 233 chilòmetros oràrios, e s'abba meda ant lassadu unu millione e batorghenta mìgia persones cun su bisòngiu mannu de assistèntzia umanitària, belle su 14% de sa populatzione haitiana. Sas autoridades ant dèvidu cumintzare a nch'interrare sos mortos in tofos comunos pro nch'istransire s'arriscu chi s'isvilupent epidemias ca sos cadàveres fiant cumintzende a si pudrigare.
Sos sucurridores sunt chirchende de otènnere meighinas, alimentos e abba neta pro sos chi si sunt sarvados. S'abba cuntaminada diat pòdere èssere veìculu de difusione de su colera, maladia chi tenet unu perìodu de incubatzione lestru e chi s'ispàinat in pagu tempus. In prus sa cunditzione econòmica bassa de sa repùblica tzentru-americana amplìficat sa disaura. Pro custu motivu s'est giai mòvida sa comunidade internatzionale.
