 |
| Deretos Mps |
S'assemblea de su Movimentu pastores sardos l'aiat disinnadu in Tramatza, in sas dies coladas. Eris in Tiesi, cara a s'istabilimentu caseàriu de Frades Pinna, unos treghentos traballadores de su cumpartu si sunt oviados pro manifestare s'arrennegu contra a sas isperecuatziones de su mercadu a dannu issoro. In sos faeddos de Felitze Floris, e de àteros chi ant pigadu sa paràula, sa chistione de su preju de su late, sa de sas produtziones in aterue, su pagamentu fartadu de sos prèmios comunitàrios.
«Semus inoghe pro fàghere cumprèndere a custa gente - gasi Floris indiritzende·si a sos meres de s'indùstria - chi si sunt fatos mannos cun su suore de babbos e de manneddos nostros. Nos depent torrare risposta in contu de finantziamentos pùblicos pigados. Mi denùntzient si est fàula». Essida a campu sa netzessidade de sighire sa pelea mancari Floris apat naradu chi «cun custos nùmeros non nche crompimus a logu». Un'invitu prus chi non craru a un'unidade prus manna e determinada.
No est mancadu su cara a cara cun sos industriales tiesinos, Andria e su fradile Pedru Luisi Pinna. "Amparados" dae sos carabineris e dae sa politzia, ant naradu a sos presentes chi de tres milliones de litros traballados in Romania, duos los ant bèndidos in Bulgaria. «Su chi nch'est cròmpidu a Sardigna - ant annantu - fiat cun bullu rumenu e fiat destinadu a su mercadu internatzionale». Mentovadu finamentas su sistema frantzesu in contu de subraprodutzione de late. «Ma in Frantza - at pregontadu unu traballadore - cantu lu pagant a litru?».
«No est beru chi su mercadu est anàrchicu», at naradu Floris. Ma sunt chistiones prus chi non ligadas a su modellu de produtzione atuale. L'ischint sos chi disinnant su preju e sos chi lu sufrint, l'ischit sa polìtica de sos agiudos e su sistema cooperativìsticu chi non podet règhere sa cuncurrèntzia de sos mannos. A su chi si tastat, sa batalla est in pessu comintzada. «Semus a tretu de dare una prospetiva de cumbata a sa gente nostra». A bìdere istemus.
