In sas costas italianas, cada 54 chilòmetros b'at unu giassu incuinadu dae sos iscàrrigos de sas fognas. Flussos de abba chi non nche colant in su depuradore. Pagu prus o mancu sunt totu in currispondèntzia de rios e canales e prus de su mesu sunt a curtzu a sas marinas.
Sos òmines de Goletta Verde, sa barchedda de Legambiente, ant prelevadu 265 campiones de abba cada 28 chilòmetros de costa pro los analizare. Sardigna, Pùllia e Vènetu sunt resurtadas sas regiones prus “netas”. Sas cunditziones prus crìticas si sunt registradas in Marche e Abrutzu, ma fintzas Campània, Calàbria, Sitzìlia, Làtziu e Ligùria non brullant. Su responsàbile sientìficu de Legambiente at naradu chi sa situatzione cunforma a s'annu coladu no est mudada ne in peus e ne in mègius.
In Sardigna b'at àpidu 5 prelievos subra de 29 chi ant marcadu un'incuinamentu grae. Semus faeddende de:
· Terranoa (Pitulongu)
· Sossu (foghe de su riu Sillis)
· Portu Turre (foghe de su riu Mannu)
· S'Alighera (Santu Giuanne)
· Tresnuraghes (foghe de su riu Jana)
In Portixeddu imbetzes, in sa comuna de Frùmini Majori, s'incuinamentu no est grae, ma b'est e pertocat sa foghe de su riu Fluminimannu. Sas àteras 23 anàlisis ant registradu valores in sa norma.
