 |
| Deretos Tjeerd Royaards |
«Sos negotziados cun sos Istados unidos sunt
fallidos a beru ca, comente europeos, non podimus atzetare a sa muda
sas rechestas americanas». Faeddos prus chi non craros, sos de su
ministru tedescu de s'Economia pro su chi pertocat su Ttip, su tratadu
de iscàmbiu lìberu intre Iua e Unione europea. Intervistadu dae
s'emitente Zdf, Sigmar Gabriel at annantu chi «non bi dêt àere prus
perunu passu a dae in antis, mancari nemos lu
chèrgiat ammìtere a beru». Intesa fartada, duncas, in cada unu de sos
27 capìtulos e a pustis de 14 addòvios. Motivos?
B'at unas cantas
chistiones in sa mesa. A primu sa fase polìtica americana, cun Trump chi
at manifestadu s'ostilidade sua e Clinton chi non si podet permìtere de
nche pèrdere s'eletoradu pro-Sanders in sas primàrias in pessu coladas.
A pustis amus àpidu sa "Brexit" (mancari sa burghesia albiònica pàrgiat
chi no apat presse de si nch'essire) e sas reatziones de carchi paisu
europeu comente a sa Frantza, mescamente in contu de "cuotas late".
Frantza e Germania: paret chi ambas natziones faeddent a boghe sola
contra a sa deregulamentatzione chi diat menguare sas diferèntzias intre
su modellu anglosassone e s'europeu (cale?).
Ma sunt faeddos in favore
de s'istadu sotziale o de sas burghesias natzionales chi dae tempus ant
contribuidu a disunire s'Europa? In sa matessi intervista Gabriel at
naradu chi est de acordu a su Ceta, tratadu simigiante a su Ttip ma
petzi intre Ue e Canadà. Faeddos prus chi non craros.
