S'esòrdiu in Sèrie A de su Casteddu no est de sos mègius, ma s'ischiat chi sa trasferta in Ligùria non fiat cosa fàtzile. Sos òmines de Rastelli ant proadu a nche ghirare carchi puntigheddu, ma sos tres gol de sos genoanos no lis ant lassadu peruna ispera.
Su primu tempus est resurtadu bastante echilibradu. Sos sardos, cun sa divisa arva, ant proadu a fraigare agigu de giogu, ma sos giogadores de Iuric ant semper rispostu cun elegàntzia a sos atacos. Fintzas su Genoa at chircadu de isblocare sa partida, ma est semper mancada sa pretzisione in dae in antis.
Su segundu tempus, imbetzes, nos donat carchi emotzione in prus. A su de 62 minutos Pavoletti, cun sa conca, proat a nche marcare su vantàgiu, ma Storari parat. A su de 66 imbetzes su Casteddu nche colat in vantàgiu cun Borriello. S'atacante, lassadu a sa sola in s'àrea de rigore, aprofitat de unu passàgiu traessu de Sau e cun sa conca nch'indiritzat sa botza a su segundu palu e signat su 0-1. Su Genoa rispondet, ma sa defensa casteddaja est ischierada e tancat totu sas ghennas. A su de 77 minutos sos sardos ant torra un'ocasione de oro, ma su tiru de Giannetti iscudet a su palu sena resurtu. Nche colat petzi unu minutu e arribat su parègiu. S'autore est Ntcham chi, dae 18 metros lassat mòvere unu tiru a filu de terra. Sa botza corfat a su cambutzu de Capuano e nche ponet fora de giogu a Storari chi si l'abbàidat intrende·nche a sa rete. Arribat fintzas su raddòpiu de sos genoanos e acontesset duos minutos a pustis. Est su de 80 minutos cando Laxalt intrat a s'àrea e nche marcat su vantàgiu faghende·nche colare sa botza suta de sas ancas de Storari. In sos ùrtimos minutos arribat fintzas su gol de Rigoni chi nche serrat sa partida de su totu. Su giogadore vènetu, collocadu in su segundu palu, brincat prus in artu de totus e incorrat su de tres. Non b'at prus tempus, su Genoa cumintzat su campionadu cun tres puntos, a su Casteddu imbetzes li tocat a pònnere fatu.
Sos òmines de Rastelli pariant rispondende bene a sos atacos ruju-biaitos de su Genoa e in su segundu tempus podiant andare a su vantàgiu dòpiu si no esseret istadu pro su palu de Giannetti. In su momentu mègius sos òmines de Juric si nche sunt pesados e ant infèrchidu sas tres istocadas de sa vitòria.
Dae inoghe a una chida at a èssere su turnu de sa Roma, partida dìliga, ma custa borta si giogat in su Sant'Elia.
Formatziones
Genoa: Lamanna, Izzo, Burdisso, Gentiletti, Lazovic (92' Fiamozzi), Rincon, Veloso, Laxalt, Pandev (62' Ntcham), Pavoletti, Ocampos (83' Rigoni).
Allenadore: Ivan Juric
Casteddu: Storari, Ceppitelli, Bruno Alves, Capuano (82' Pajac), Isla, Padoin, Di Gennaro (69' Munari), Ionita, Murru, Borriello, Sau (73' Giannetti).
Allenadore: Massimo Rastelli
Gol: 66' Borriello, 78' Ntcham, 80' Laxalt, 88' Rigoni
