 |
| Deretos Latuff/Wikileaks |
Su situ de documentos segretos at postu a disponimentu de totus 294.548 messàgios de posta eletrònica de s'Akp, su partidu de Recep Tayyip Erdogan. Sa tzensura est iscatada deretu, s'autoridade turca pro sas telecomunicatziones at blocadu s'atzessu a Wikileaks pro totu sos tzitadinos turcos.
Sos messàgios prus reghentes sunt de su ses de trìulas, deghe dies in antis de su corfu de istadu faddidu. Sos prus betzos imbetzes sunt de su 2010. Sa majoria de sas comunicatziones “furadas” sunt impreadas pro comunicare cun s'èsteru in contrapositzione cun sas chistiones internas prus dìligas.
Su situ de s'organizatzione internatzionale cheret collaboratzione dae totus, in manera chi sas informatziones siant ispartzighinadas cantu prus possìbile in totu su territòriu turcu.
