Chenàbura a mangianu sos guvernos de sas duas ìsulas sorres s'ant a riunire in sa tzitade de Ajàciu pro giùghere a in antis su progetu de macro-regione de su Mediterràneu e de s'Europa.
Sa Consulta sardo-corsa, istituida cun duos documentos su 28 de abrile e su 26 de maju de ocannu, s'at a cunfrontare pro aproare su regulamentu internu e pro istabilire e programare atziones de importu pro s'amparu e sa valorizatzione de su patrimòniu linguìsticu e culturale.
A s'assemblea, cunvocada dae su presidente de su Consìgiu regionale Giuanne Frantziscu Ganau in pare cun s'anàlogu suo Ghjuvan Guidu Talamoni, ant a leare parte finas sos retores de sas universidades de ambas ìsulas.
