 |
| Deretos time.kz URL imàgine |
Antonio Ramòn Prieto Navarro, publitzista de sa testada ispagnola indipendente La biela libre s’at gastadu unos cantos agetivos e faeddos a bolu pro descrìere su curridore sardu, intzertende·los belle totus. «Así es Aru, coraginoso, atacante, valiente, sufridor. Un auténtico caballo de carreras desbocado. Le llaman el Cavaliere dei quattro mori. Bien podría ser de quattro morti, por que muere, respira, vuelve a morir y puede hacerlo 10 veces hasta cruzar la meta».
Gasi est Aru, coragiudu, atacante, balente, suferente. Unu caddu de cursa fuidore. Sos giornalistas italianos, sighende una norma no iscrita, una règula folclòricu-esòtica chi costumant a impreare pro cale si siat cosa, pessone o eventu pertochet sa Sardigna, l’ant batijadu Cavaliere dei 4 mori e Ramòn nch’agiunghet chi li podiant pònnere de sas bator mortes, a dae chi, in cada cursa, paret chi mòrgiat e torret a nàschere duas, tres, deghe bortas. E est sa veridade. Est una veridade chi imbòligat cale si siat curridore tèngiat su talentu de èssere forte in sas trempas. Cada iscaladore. Ca, nargiamus·lu sena dudas, su chi bestit umore, su chi pilisat sas intragnas in su tziclismu, est su curridore chi faghet sa diferèntzia leende a puntu in susu.
E Fàbiu, l’at dimustradu prus de una bia. A puntu in susu bolat, lèbiu che pinna de pugione. Sa pedalada tunda sua, su chircu chi pintat a cada giru de pedale est su traballu de un’artista, de unu pintore che a Giotto chi, sena ischire mancu dae ue li benit, tenet su donu de sa perfetzione. In su giru de su Delfinadu, pagas dies a oe, nos l’at acraridu binchende sa peus de sas tapas de monte. Sena chi nemos bi l’aeret pedidu, sena chi sos preparadores atlèticos pro su Giru de Frantza - a ue at a leare parte in su mese de trìulas - bi l’aerent pretesu. Fàbiu est fatu gasi: bida sa trempa e violada; miradu su puntu in susu e barigadu, belle semper a sa sola. Ca in logu de monte su tziclista est semper a sa sola, finas si est inghiriadu dae chentu curridores che a issu. Cando su caminu si pesat a ritzu, fintzas sos gregàrios, sos chi diant dèvere agiudare su capitanu, si rendent suta sa rechinta e, unu in borta, tzedent e ruent bìnchidos dae su dolore chi si nch’inferchit in sos mùsculos, in sos ossos e in totu s’istrutura òmine-bitzicleta.
E tando, torrende·nos a logu nostru, torrende a leare in manos s’istòria de Sardigna, in càmbiu de Cavaliere dei 4 mori chi cheret nàrrere totu e nudda, nois lu podimus batijare Su Componidori. Tèrmine a sa segura prus serente, idiomàticu e sardu chi nudda nche li toddet a sa figura mìtica aristanesa e totu li podet agiùnghere e dèghere a su curridore sardu, isetende chi carchet sas trempas de Sardigna. Dae Gennargentu a Limbara colende dae Sìlana conca a mare. E pro su chi pertocat su giru de Frantza, non nos abarrat àteru chi no a l’augurare unu prus chi non sardu: a tempus prus!
