de Màuru Piredda
 |
| Umberto "Eros" Lorenzoni. Deretos sa gazeta |
Acumpangiadu dae Pedru Dettori, su presidente de s'Anpi de sa provìntzia de Nùgoro, Umberto Lorenzoni, est a nàrrere su partigianu "Eros", nch'est cròmpidu a Sardigna pro unos cantos addòbios in Durgali e in Thiniscole. Sa punna fiat sa de sa defensa de sa Costitutzione contra a sos perìgulos chi, a s’ispissu, si presentant pro nche l'iscontzare. Ma sa relata sua at tocadu temas diferentes, mancari ligados a pare.
«Sa Costitutzione nostra - at esordidu su Resistente - la sunt torra atachende, ma s'atacu chi benit dae custu guvernu est tramperi. S'Anpi tenet un'istatutu chi nos imponet de la defensare, in pare cun sos valores suos. E s'Anpi non tenet guvernos amigos». Unu messàgiu craru pro su primu ministru, Matteo Renzi, definidu «unu pitzocone chi creet de èssere Napoleone». E finamentas pro su presidente emèritu de sa Repùblica, Giorgio Napolitano («unu chi no at fatu su dovere suo cando deviat, unu chi si nch'at ismentigadu su tempus coladu suo»).
Pro Lorenzoni su chi nos cherent impònnere est «unu bicameralismu trobojadu»: «Tocat - at agiuntu - de bìnchere in su referendum de s'atòngiu chi benit pro chi non nos torret a dominare su blocu sotziale chi amus fertu cun sa Resistèntzia».
Ammentadas sas conchistas costitutzionales comente «sa soberania populare, s'indipendèntzia econòmica, s'agualidade sustantziale». Ma posca «àmus àpidu sa furriada liberista e sas privatizatziones de s'economia, sa tràmuda de su dinare dae su traballu a s'ispeculatzione, sa possibilidade chi pagos fatzant dinare dae su dinare».
Paràulas craras finamentas pro su referendum de domìniga 17: «Tocat a votare chi emmo ca no est a firmare petzi bator trivellas. Tocat a votare chi emmo pro dare una mudada a sa polìtica energètica de custu paisu chi investit pagu in sas rinnovàbiles».
